Fescht 50 Joor Wiehlmys 2007

Sa. 16. Juni 2007

50 Joor Wiehlmys oder d’Piraate sinn los

Nach langer Vorberaidigszyt isch es denn ändlig Samschtig 16. Juni 2007 worde, wo d’Wiehlmys ihr 50 jäärigs Jubiläum hänn derfe fiiere. Am friehe morge sinn scho e baar emsigi Hälfermys in Glaihyynige bim Partyschiff yydrooffe um uss däm Schiff e Piraateschlappe z’mache. Wo mir denn uff dr Andy Hunziker gwartet hänn, sinn mir nit aifach undäätig umme gsässe, nai mir hänn unsere Taatedrangg beraids aafoh usslääbe und hänn d’Luftballöön uffbloose.

Wo dr Andy mit sim Laschtwäggeli voller Iiberraschige voorgfaahre isch, hett me die Hälfermys nimme kenne halte,vo Neygier erfasst sinn mir alli go luege was är in sim Laschtwäggeli alles drinne ka hett. Im Andy isch es glungge geniali und reali Piraaterequisite uff z’triibe. Palme, e Fischernetz, Faggle, e baar härzigi orientalischi Lämpli, e Schatzkischte, e halbs Ruederschiffli und zem Schluss e lääbensgrossi Piraatestatue. Das alles hett miesse uff’s Ooberdegg vom Partyschiff gschleppt wärde, ohni Schweiss isch das nit gange, denn die Sache hänn doch ihr Gwiicht ka.

Nachdäm denn alles d’oobe gsi isch, isch s’dekoriere los gange. Immer wieder isch dr Blick richtig Himmel gange denn an däm morge hett sich dr Petrus nonnig entschiiede ob är e Muus isch oder e Spiilverdärber. Denn wenn’s wär ko go räägne, hätt me alles miesste uff’s Zwyschedegg schleppe damit das Piraatefescht ka im droggene stattfinde. Doch dr Andy isch so vo dr Gunscht vom Petrus yberziigt gsi. Wär jo au schaad gsi, denn uff däm Oberdegg hänn die Dekosache e fantastischi Wiirgigg ka.

Nachdäm alles für dr Oobe baraat gsi isch hänn mir ys haim begäh um ys fir dä Oobe, Theme grächt fertig z’mache. Wo ich mi denn wiider uff e Wääg zem Piraateschiff gmacht ha, hett mi Muushärz höher gschlaage, denn es sinn e huufe Piraate und Piraatebrüüt, Haaremsdaame und e Landratte zum Träffpunggt underwägs gsi. Under blauem Himmel mit sunnig warme Straahle isch denn dr Apéro gnosse worde. An däre Stell e härzligs Danggerscheen an alli Köch/inne und Begger/inne wo gluegt hänn, dass dä Apéro so aimoolig gworde isch. Langsam aber sicher sinn denn alli yydroffe und ych ha deerfe mit Stolz festschtelle, dass sich alli Mieh gäh hänn und sich im Thema entsprächend verglaidet hänn.

Au hetts mi waahnsinnig Gfreyt, dass sovyl Passivmitglieder goschdymiert ko sinn. Uff aimool hesch vo wytem gheert, es drummlet und pfyyft, aber wo? Uff em Rhy. E baar Mys hänn e Langschiff g’enteret, und die arme Siesswassermatroose zwunge, sie uffem Wasserwäg an das Partyschiff z’befördere. Nach em Apéro isch me denn an Disch bätte worde, wunderschön und yylaaden hänn sie ussgseh.

S’ z’Nachtässe hett dr Catering Momo beraits gstellt ka, so dass me sich am Buffet hett kenne bediene. Am spöötere Oobe hett denn d’Goschdym-Jury ihre Entschaid troffe und s’originellschte und beschtumgsetze Themegoschdym erkoore und präämiert. Es hett zwai Kategorie gäh, Kinder und Erwaggseni. Bi de Kinder hett d’Celine Hürlimann gwunne und bi de Erwachsene d’Sandra Galler wo e Landratte gsi isch.

Wie ihr Eych vylicht no Erinnere kennet, es hett au no e Luckybrys gäh wo uss de Yydrittskaarte zooge worde isch und do isch dr glyggligi Gwynner dr Roland Portmann gsi. Nonemool härzligi Glyggwunsch an alli. D’Stimmig uff em Piraateschlappe isch unbeschriiblig gsi, wo’s yydungglet hett, sinn alli Liechter und Faggle aazunde worde, dr DJ Gränny hett kuunterbuunti Muusig uffgleegt. D’Piraatemys hänn danzt oder sinn aifach do gsässe und hänn die wunderbari Stimmig gnosse.

Laider hetts denn doch nach Mitternacht aafoh räägne und so sinn die erscht Mys haime gange. Die emsige Hälfermys sinn wiider in Yysatz ko, sie hänn denn ganz rascht alles wiider zäme gruumt und versorgt.

Dangg Eych allne isch es e tolls Fescht gsi, drumm mecht ych’s nit versuume und mi bim OK bedangge, sowie allne Hälfermys die irgendwie gholfe hänn und bydrait hänn, dass es so schön gsi isch. Wär no meechti noocheschwellgge, ka uff unserer Homepage alli Fööteli go aaluege.

Eyri Obfrau

Claudia Neuenschwander